Kompromisu Kandidatu Jeneral LAT Avansa Independente iha Eleisaun Prezidensiál 2027

DILI-Maske prosesu rejistu no verifikasaun kandidatura ba eleisaun prezidensia periodu 2027-2032 offisialmente seidauk hahú, maibé Jenerál Reformadu Lere Anan Timur ho naran kompletu Tito da Costa Cristóvão, hatudu ona nia kompromisu atu kandidata an nu’udar kandidatu independente hodi kompete iha eleisaun prezidensiál ba períodu tuir mai.

Durante hala’o movimentu iha baze no konvoka enkontru ho komunidade sira, kandidatu ne’ebé mai ho lema “Marka Diferansa” hateten, bainhira asumi knar nu’udar Xefi Estadu, tenke sai simbolu unidade nasional no kontinua promove dialogu ho parte hotu tanba ida ne’e mak save ba dezenvolvimentu nasaun.

Intensaun Jenerál Reformadu Lere Anan Timur kandidata an fila fali ba Prezidente Repúblika periodu 2027-2032 nu’udar vontade atu kontinua kontribui hodi servi nasaun no povu Timor-Leste, bazeia ba esperiénsia iha luta rezisténsia no kompromisu ne’ebé hatudu ona liu husi servisu defeza nasionál no partisipasaun iha vida demokrátika.

Prinsipiu fundamental husi kandidatura ne’e, buka promove unidade nasionál, hametin dame no rekonsiliasaun, enkoraja diálogu entre lideransa polítika no defende Konstituisaun RDTL.

Hare ba prinsipiu hirak ne’e, Jeneral Reformadu Lere anan Timur nu’udar kandidatu ideal ne’ebé iha kapasidade atu promove diálogu, respeita diferensa polítika no defende sidadaun hotu-hotu sein diskriminasaun. Nia mós hatudu kompromisu atu apoia dezenvolvimentu sustentável no hadi’a kondisaun moris povu, tuir kompeténsia konstitusionál Prezidente Repúblika.

Tanba ne’e, sidadaun sira presiza haree la’ós de’it kandidatu nia liafuan no promessa, maibé mós nia istória servisu, integridade, kompromisu no proposta konkretu ne’ebé bele kontribui ba futuru di’ak liután ba Timor-Leste.

Lere Anan Timur figura ida ne’ebé iha istória luta rezisténsia Timor-Leste no servisu iha instituisaun defeza nasionál. Nia trajetória liga ho luta ba libertasaun nasionál, lideransa militár no partisipasaun iha prosesu polítiku nasaun nian.

Durante okupasaun Indonézia, Lere partisipa iha luta rezisténsia liuhusi FALINTIL. Hafoin Timor-Leste restaura independénsia, nia kontinua servisu iha F-FDTL no sai Xefe Estadu-Maior Jenerál iha tinan 2011. Esperiénsia hirak-ne’e sai parte importante husi nia perfil públiku no nia servisu ba nasaun.

Iha preparasaun ba Eleisaun Prezidensiál 2027, Lere Anan Timur relata husi medial lokal balun iha inisiu Setembru 2026 katak, sei avansa nu’udar kandidatu independente, hafoin Komité Sentrál FRETILIN, iha reuniaun loron 29 Agostu 2026, foti desizaun katak partidu sei la aprezenta kandidatu rasik ba eleisaun prezidensiál.

Nune’e, Lere nia intensaun atu kandidata an sei tama iha prosesu demokrátiku ne’ebé fó oportunidade ba sidadaun sira atu aprezenta kandidatura tuir rekizitu konstitusionál no lei eleitorál ne’ebé vigora.

Maski naran Lere Anan Timur hahú tama iha diskusaun públika kona-ba kandidatu potensiál sira ba eleisaun prezidensial tuir mai, intensaun atu kandidata an tenke bazeia ba estatutu kandidatura ofisiál. Kandidatura ofisiál sei depende ba kumprimentu rekizitu legál no prosesu rejistu no verifikasaun husi autoridade eleitorál kompetente. (Media LAT)